Get real time updates directly on you device, subscribe now.
ଢେଙ୍କାନାଳ : ଓଡ଼ିଶା ରାଜ୍ୟ ବିଦ୍ୟାଳୟ କ୍ରୀଡ଼ା ସଂଗଠନ ଓ ଢେଙ୍କାନାଳ ଜିଲ୍ଲା ବିଦ୍ୟାଳୟ କ୍ରୀଡ଼ା ସଙ୍ଗଠନ ଦ୍ଵାରା ଆୟୋଜିତ ଓଡ଼ିଶା ରାଜ୍ୟ ବିଦ୍ୟାଳୟ ସମୂହ ୧୪ ଏବଂ ୧୭ ବର୍ଷରୁ କମ୍ ବାଳକ ଓ ବାଳିକା ବିଭାଗ ତ୍ରି ଦିବସୀୟ ଯୋଗ ଓ ସତରଞ୍ଜ (ଚେସ୍) ପ୍ରତିଯୋଗିତା -୨୦୨୩ ସ୍ଥାନୀୟ ଶତାୟୁ,ବ୍ରଜନାଥ ବଡ଼ଜେନା ସରକାରୀ ଉଚ୍ଚ ବିଦ୍ୟାଳୟ,ଢେଙ୍କାନାଳ ପରିସରରେ ଉଦ୍ ଘାଟିତ ହୋଇଯାଇଛି।
ଏହି ଉପଲକ୍ଷେ ଢେଙ୍କାନାଳ ଜିଲ୍ଲା ଶିକ୍ଷା ଅଧିକାରୀ ବିନିତା ସେନାପତିଙ୍କ ସଭାପତିତ୍ବରେ,ଜିଲ୍ଲା ଶିକ୍ଷା ଶାରୀରିକ ଶିକ୍ଷା ଅଧିକାରୀ ଜ୍ୟୋତି ପ୍ରକାଶ ପରିଡ଼ାଙ୍କ ସଂଯୋଜନାରେ ଓ ଜିରାଳ ଉଚ୍ଚ ବିଦ୍ୟାଳୟ ଶାରୀରିକ ଶିକ୍ଷକ ବିପିନ ବିହାରୀ ସାହୁଙ୍କ ମଞ୍ଚ ପରିଚାଳନାରେ ଅନୁଷ୍ଠିତ ଉଦ୍ ଘାଟନୀ ଉତ୍ସବରେ ସୁଧୀର କୁମାର ସାମଲ ମାନ୍ୟବର ବିଧାୟକ, ଢ଼େଙ୍କାନାଳ ମୁଖ୍ୟଅତିଥି ଭାବରେ ଯୋଗଦାନ କରି ଯୋଗ ଓ ସତରଞ୍ଜ ଶରୀର ଓ ମନକୁ ସୁସ୍ଥ ରଖେ ବୋଲି ଅଭିମତ ରଖିଥିଲେ। ଆଗାମୀ ଦିନରେ ଢେଙ୍କାନାଳ ଜିଲ୍ଲାକୁ ଏକ କ୍ରୀଡ଼ା ହବ୍ ରେ ପରିଣତ କରିବାକୁ ସରକାର ବଦ୍ଧ ପରିକର ବୋଲି ଘୋଷଣା କରିଥିଲେ।
ମୁଖ୍ୟବକ୍ତା ଭାବରେ ଅବସର ପ୍ରାପ୍ତ ଜିଲ୍ଲାପାଳ ସତ୍ୟ ରଞ୍ଜନ ସାହୁ ଯୋଗଦାନ କରି ସ୍ଵୀୟ ବକ୍ତବ୍ୟରେ ଯୋଗ ହେଉଛି ଭାରତୀୟ ସଂସ୍କୃତିର ମୂଳପିଣ୍ଡ ଓ ଶୈଶବରୁ ବାର୍ଦ୍ଧକ୍ୟ ପର୍ଯ୍ୟନ୍ତ ହସ ଜୀବନକୁ ସୁସ୍ଥ ରଖିଥାଏ ଓ ଏହାହିଁ ହେଉଛି ଜୀବନର ଜିଇଁବାର ଏକ କଳା ବୋଲି ମତ ପ୍ରକାଶ କରିବା ସଙ୍ଗେ ସଙ୍ଗେ ସତରଞ୍ଜ ଖେଳ ଏକାଗ୍ରତା ଓ ମାନସିକ ଦକ୍ଷତା ବୃଦ୍ଧି କରିଥାଏ ବୋଲି ଦୃଢ଼ୋକ୍ତି ପ୍ରକାଶ କରିଥିଲେ।
ଅନ୍ୟତମ ସମ୍ମାନିତ ଅତିଥି ଭାବରେ ଢେଙ୍କାନାଳ ଅତିରିକ୍ତ ଜିଲ୍ଲାପାଳ ରମେଶ ଚନ୍ଦ୍ର ସେଠୀ, ଜିଲ୍ଲା କ୍ରୀଡ଼ା ଅଧିକାରୀ ପ୍ରଦୀପ୍ତ କୁମାର ମହାନ୍ତି, ପ୍ରଫୁଲ୍ଲ କୁମାର କାଲୋ ଗୋଷ୍ଠି ଶିକ୍ଷା ଅଧିକାରୀ , ଓଡାପଡ଼ା, ଶାରୀରିକ ଶିକ୍ଷା ଅଧିକାରୀ , ମୟୂରଭଞ୍ଜ,ଭାଗିରଥୀ ମଲ୍ଲିକ, କୈଳାସ ଚନ୍ଦ୍ର ପ୍ରଧାନ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟର ସହକାରୀ ନିର୍ଦ୍ଦେଶକ ଶାରୀରିକ ଶିକ୍ଷା ପ୍ରମୁଖ ସମସ୍ତ ଅତିଥି ବୃନ୍ଦ ଯୋଗ ଓ ସତରଞ୍ଜ ଖେଳ ଛାତ୍ରୀ ଛାତ୍ର ମାନଙ୍କର ଶାରୀରିକ ଓ ମାନସିକ ସୁସ୍ଥତା ସମ୍ଭବ ହୋଇଥାଏ ଓ ଆଧ୍ୟାତ୍ମିକତାର ଅଭିବୃଦ୍ଧି ସମ୍ଭବ ହୋଇଥାଏ ବୋଲି ଦୃଢ଼ ମତପୋଷଣ କରିଥିଲେ।
ବି. ବି. ହାଇ ସ୍କୁଲ୍ ର ପ୍ରଧାନଶିକ୍ଷିକା ତଥା କାର୍ଯ୍ୟକ୍ରମର ସାଙ୍ଗଠନିକ ସମ୍ପାଦିକା ବ୍ରହ୍ମୋତ୍ରୀ ବିଶ୍ଵାଳ ଅତିଥି ପରିଚୟ ପ୍ରଦାନ ଓ ସ୍ବାଗତ ଭାଷଣ ପ୍ରଦାନ କରିବା ଅବସରରେ ଯୋଗ ଓ ସତରଞ୍ଜର ସୃଷ୍ଟି ଓ ଶିକ୍ଷା ସହିତ ଏହାର ସଂଯୋଗ ସମ୍ପର୍କରେ ସବିଶେଷ ସୂଚନା ଦେବା ସଙ୍ଗେ ସଙ୍ଗେ ସମସ୍ତଙ୍କୁ ସ୍ଵାଗତ କରିଥିଲେ। ଢେଙ୍କାନାଳ ଜିଲ୍ଲା ଶିକ୍ଷା ଅଧିକାରୀ ବିନିତା ସେନାପତି ସ୍ଵୀୟ ସଭାପତିଙ୍କ ଅଭିଭାଷଣରେ ଯୋଗ କଳା ଓ ବିଜ୍ଞାନର ଅପୂର୍ବ ସମନ୍ୱୟ ଓ ସତରଞ୍ଜ ଖେଳ ଛାତ୍ରୀ ଛାତ୍ର ମାନଙ୍କର ଏକାଗ୍ରତା ବୃଦ୍ଧି, ପିଲାଙ୍କୁ ଶାନ୍ତ ଓ ଧୀର ସ୍ଥିର କରି ସ୍ମରଣ ଶକ୍ତିର ଅଭିବୃଦ୍ଧି, ଚକ୍ଷୁର ସୁସ୍ଥତା ବଜାୟ ରଖି ଶିକ୍ଷା କ୍ଷେତ୍ରରେ ସଫଳତା ଆଣିଥାଏ ବୋଲି ମୂଲ୍ୟବାନ ସୂଚନା ପ୍ରଦାନ କରିଥିଲେ।
ଜିଲ୍ଲା ଶିକ୍ଷା ଶାରୀରିକ ଶିକ୍ଷା ଅଧିକାରୀ ଜ୍ୟୋତି ପ୍ରକାଶ ପରିଡ଼ା ସ୍ଵୀୟ ବକ୍ତବ୍ୟରେ ଏଠାରୁ ଉପଯୁକ୍ତ ସର୍ବଶ୍ରେଷ୍ଠ ପ୍ରତିଯୋଗୀମାନଙ୍କୁ ଚୟନ କରାଯାଇ ଜାତୀୟ ସ୍ତରକୁ ପ୍ରେରିତ କରାଯିବ ବୋଲି ମତବ୍ୟକ୍ତ କରିବା ସଙ୍ଗେ ସଙ୍ଗେ ଧନ୍ୟବାଦ ଅର୍ପଣ କରିଥିଲେ। ସଭା ପ୍ରାରମ୍ଭରେ ମଞ୍ଚା ସୀନ ଅତିଥି ମାନଙ୍କ ଦ୍ଵାରା ଜଗନ୍ନାଥଙ୍କ ପ୍ରତିମୂର୍ତ୍ତିରେ ପୁଷ୍ପ, ଧୂପ ଅର୍ପଣ ଓ ପ୍ରଦୀପ ପ୍ରଜ୍ବଳନ କରାଯାଇଥିଲା। ବିଦ୍ୟାଳୟର ସଂସ୍କୃତ ଶିକ୍ଷୟିତ୍ରୀ ଡ଼ଃ ଅନୁପମା ମିଶ୍ର ମଙ୍ଗଲଚରଣ ଗାନ ଓ ତାଙ୍କ ନେତୃତ୍ଵରେ ଛାତ୍ରୀମାନେ ଶାନ୍ତି ପାଠ କରିଥିଲେ।
ସୁଲକ୍ଷଣା ଦେବୀ ଉଚ୍ଚ ବିଦ୍ୟାଳୟର ଛାତ୍ରୀ ମାନେ ସୁମଧୁର ସ୍ବାଗତ ସଙ୍ଗୀତ ଗାନ କରିଥିଲେ।ପରିଶେଷରେ ସାଂସ୍କୃତିକ ବିଭାଗ ଦାୟିତ୍ୱରେ ଥିବା ସଂସ୍କୃତ ଶିକ୍ଷକ ଦୀପ୍ତିଶ କୁମାର ଶତପଥିଙ୍କ ନେତୃତ୍ବରେ ଶ୍ରୀ ଅରବିନ୍ଦ ସ୍କୁଲ୍ ,ମାତୃଭବନ ବାରଦା,ବି.ବି.ହାଇସ୍କୁଲ୍,ସୁଲକ୍ଷଣା ଦେବୀ ଉଚ୍ଚ ବିଦ୍ୟାଳୟ ଓ ପଂଚାୟତରାଜ ଉଚ୍ଚ ବିଦ୍ୟାଳୟ,କାନପୁରା ଛାତ୍ରୀଛାତ୍ର ମାନଙ୍କ ଦ୍ଵାରା ବର୍ଣ୍ଣାଢ଼୍ୟ ସାଂସ୍କୃତିକ ବିଚିତ୍ରା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ଏହି କାର୍ଯ୍ୟକ୍ରମକୁ ସଫଳ କରିବାରେ ଢେଙ୍କାନାଳ ଜିଲ୍ଲାର ସମସ୍ତ ବିଦ୍ୟାଳୟର ପ୍ରଧାନଶିକ୍ଷକ,ପ୍ରଧାନ ଶିକ୍ଷିକା, କ୍ରୀଡ଼ା ଶିକ୍ଷୟିତ୍ରୀ,ଶିକ୍ଷକ ଓ କର୍ମଚାରୀ ବୃନ୍ଦ ସହଯୋଗ କରିଥିଲେ।
- Advertisement -
